Dr Trueberbueb

I bi ne Ämmithaler, u desse bin'i stolz.
Es wachst i üsne Grebe viel saftigs Pfyffeholz, viel saftigs Pfyffeholz, u mänge chäche Bueb!
Ja, i bi ne Ämmithaler, i bi ne Bueb, e Bueb vo Trueb!
Ja, i bi ne Ämmithaler, i bi ne Bueb, e Bueb vo Trueb!

Im Hütte, Brandösch, Twäre, im Fankhuus bis zum Napf,
da förchtet me fy tapfer nid gleitig Chlupf u Chlapf, nid gleitig Chlupf u Chlapf,
wi mänge bleiche Bueb!
Ja, i bi ne Ämmithaler.....

My Vater, dä het gschwunge, scho mängisch obenuus.
Dä lehrt mi's o am Abe u Morge vor em Huus,u Morge vor em Huus.
I bin ne Schwingerbueb!
Ja, i bi ne Ämmithaler.....

O d'Muetter isch e feschti, sy chunt vom Sältebach.
Im Sältebach isch sälte es Meitschi pring u schwach, es Meitschi pring u schwach.
I bi d'r Muetter Bueb!
Ja, i bi ne Ämmithaler.....

Nid alles mache d'Arme u d'Bei mit Schmalz u Saft.
Mi muess im Härzen inne o ha die rächti Chraft, o ha di rächti Chraft.
Muess sy ne treue Bueb!
Ja, i bi ne Ämmithaler.....

Mym Herrgott wott is zeige und o mym Vaterland.
We's rüeft, so nimmt me d'Büchse rächt flingg u fescht i d'Hand, rächt flingg u fescht i d'Hand.
I bi ne Schwyzerbueb!
Ja, i bi ne Ämmithaler.....


Text: Pfr. Gottfried Strasser | Melodie: J. Rud. Krenger